الدكتور إبراهيم مجدى حسين يكتب: إبن الأصول..عندما يفسخ الخطوبة!!
ولاد الأصول المحترمين لما حد بيسألهم عن أسباب عدم استكمال الارتباط بيقولوا كلمة واحدة و هي «محصلش نصيب ».
أما أولاد العولمة يفرطون قي ذكر و تعرية و فضخ العيوب تحت مسميات علاقة toxic سامة و red flags ريد فلاجز وأصبح فضح العيوب سوق مربح .
ونسمع كلام من نوعية ابن امه بخيل مقرف و مجنون بالشك عايز يفرض سيطرته ،أو يقول عليها بومة و«وش فقر» و«مجنونة»و.. و.. أمها مسيطرة علي أبوها وأبوها رجل مش «ولا بد» و شخص هفأ وإنها ملهاش كبير .
ده ملخص شكاوي المنفصلين او المفركشين اللى بنسمعها في العيادة.
الأصول بتقول نسيب بعض بالمعروف دون تجريح ودون إساءة.
الأصول بتقول البيوت الاسرار .
الأصول بتقول عيب مش كل حاجة تتقال.
الأصول بتقول في احترام للعشرة.
الأصول بتقول نفتكر الحاجات والذكريات الحلوة .
الأصول بتقول خليك ذوق و خلي لسانك حلو.
الأصول بتقول إن الناقص هو اللى يدخل البيوت ويفضح الناس .
الأصول بتقول إن عمر ما الكلام السلبي والذم هيجيب لك حقك أو يكسبك تعاطف بل بالعكس الناس هتزهق منك بعد كده وهيقولوا عليك مش أمين.
